شەتەلدەگى قازاق ۇيىمدارىنىڭ باسشىلارى, قوعام بەلسەندىلەرى, جاناشىرلارى جانە شەتەلدەگى عىلىم, ءبىلىم, مادەنيەت, بيزنەس, مەديا, ساياسات سىندى باسقا دا سالالاردىڭ كورنەكتى وكىلدەرى ويلارىن ورتاعا سالدى.
گەرمانيانىڭ كەلن قالاسىنداعى قازاق قاۋىمداستىعىنىڭ ءتورايىمى, ەۋروپا قازاقتارى قۇرىلتايىنىڭ ءتورايىمى ساديا سۇرەر مۇنداي فورۋم ۇلتتىق تامىرىمىزدان اجىراپ قالماۋ ءۇشىن قاجەت دەيدى.
ء«بىز بۇگىن استانا تورىنە جينالدىق. مۇنداي باسقوسۋدىڭ ماڭىزى زور. سەبەبى دۇنيەنىڭ ءتورت تارابىنداعى تارىداي شاشىراعان قازاقتىڭ ارقاسۇيەرى, اتا جۇرتى − قازاقستان. سوندىقتان وسى فورۋمدى ۇيىمداستىرۋشىلارعا العىس ايتامىن. گەرمانياداعى قازاقتار ءجيى باس قوسىپ تۇرامىز. توي-تومالاق, استا عانا ەمەس, باسقا دا رۋحاني بايلانىس ورنايتىن جيىندار ءجيى وتەدى. مۇنىڭ بارلىعى دا ءبىزدىڭ جاس ۇرپاقتىڭ ۇلتتىق تامىرىنان اجىراپ قالماۋى ءۇشىن كەرەك. ءبىزدىڭ بالالارىمىز انا ءتىلىن ۇمىتپاۋى ءۇشىن, جاھاندانۋعا جۇتىلىپ كەتپەسىن دەپ ءجيى جينالىپ, ۇلتتىق قۇندىلىقتارىمىزدى دارىپتەپ كەلەمىز. استانا قالاسى كۇننەن كۇنگە كوركەيىپ بارادى ەكەن. جاس مەملەكەتتىڭ وركەندەۋى ەل ىشىندەگى تىنىشتىققا تىكەلەي تاڭۋلى», دەدى ساديا سۇرەر.
